My First Ever Poem in Isinay

BALIWAWAY SI TIYEHAW Dimmatong mot tiyehawar, Eteng on Idong Mandiringan mot pay usisiw on pangkantan Di mantetteyavar dari, avabbayung, on durun Umungán tu mot pay gi’naar asta nomnom. Uryan da’ tun anapon, diyoya’ tut di wangwang Kukkuyappona’ tun mibevoy si dee yar savung Osan atittino’ maning-aw si dinu war on botlong On tadah an mansoo’or si mailomar ato’tong. Uryan da’ tun anapon mu namalintur soy-angar Alalu, tuldu’ on baruya’ tu mot mantemutemu’ Sivoh o mu tittiwaddona’ tu an manlaptulaptu’ Manuttur si kolang si teyantahar an mabittuh. Uryan da’ tun anapon mu umali mot di laviyar Mambaliwa’ tun i’irung, laman, on bavuy si eyas Ahamungo’ tu ri giyunar darit baiyurar maroot Uwes un tu ri buwen on bittuwonar maman-oh. Dumatong ila órasar uryan da’ mot maanapan Ayon yun tun ilan inoy uwar darin nanlang-ayan Saon tu daráre umas-asupar atittíno’ on i’irung Saon tu ri manpasing-awar an dinu on botlong! (Binebbevoy un sinulat Marso 30, 2016 siri Baguio)